रौतहट २७ श्रावण । आउँदो स्थानीय तह निर्वाचन २०८४ का लागि रौतहटको परोहा नगरपालिकाबाट मो.एजाजुर रहमान उर्फ काबीरले मेयर पदमा उम्मेदवारी दिने घोषणा गरेका छन्। ‘जुनसुकै परिस्थिति आएपनि अब म पछि हट्दिन,’ काबीरको स्पष्ट अडान छ।
परोहा नगरपालिकाको स्थानीय जनसमुदाय बाट निरन्तर चासो र अपेक्षा व्यक्त भइरहेका बेला काबीरले आफ्नो राजनीतिक योजना सार्वजनिक गरेका हुन्। परोहा नगरपालिका वडा नम्बर २ जिंगडवा टोलका स्थायी बासिन्दा काबीर २०७४ सालको पहिलो स्थानीय तहको चुनावमा नेकपा माओवादी केन्द्रबाट वडाअध्यक्ष पदमा भारी मतले विजयी भएका थिए।
उनको त्यस कार्यकालमा देखिएको व्यवहार, पहुँच र जनतासँगको सम्बन्धले धेरैको ध्यान तानेको थियो। यद्यपि राजनीतिक उतारचढाव र व्यक्तिगत संघर्षका कारण उनी केही समय जेल जीवनमा समेत रहे। अहिले उनी स्वतन्त्र हैसियतमा रहेका छन्।
‘२०७४ सालमा जनताको अपेक्षा अनुसार समय दिन सकिनँ, तर अब पुरै तयारीसाथ नयाँ धार, नयाँ सोच र नयाँ अभियान सहित अघि बढ्नेछु,’ काबीरले भने। उनले अबको चुनावमा विकास, जनसरोकारका काम र पारदर्शितामा जोड दिने बताएका छन्। पार्टीभन्दा माथि उठेर स्थानीय नेतृत्वमा विश्वास गर्ने जनताको आवाज सुनेरै उनले नयाँ बाटो रोजेका हुन मो.काबिरले बताएका छन ।
