रौतहट ।। रौतहटको माधवनारायण नगरपालिका-६ माधोपुर घर भएकी २६ वर्षीया रुविकुमारी साहको हत्यामा संलग्नलाई खोजी गर्न जिल्ला प्रहरी रौतहटले केन्द्रीय अनुसन्धान ब्युरो (सीआईबी) आग्रह गरेको छ । शनिबार रातिको घटनाको अहिलेसम्म दोषी पत्ता लागेको छैन ।
जिल्ला प्रहरीले आइतबार मधेश प्रदेश प्रहरी कार्यालयलाई पत्र पठाई सीआईबीलाई घटनाको अनुसन्धान गर्न अनुरोध गरेको हो । रुविको हत्या गरेर सुटकेसमा कोची कसले सडकमा फालेको भन्ने रहस्य अहिलेसम्म खुलेको छैन ।
सुटकेसमा मृत भेटिएकी रुविका श्रीमान् शिव सागर साह भारतबाट रौतहट आइपुगेका छन् । प्रहरीले साहसित सोधपुछ सुरु गरेको छ ।
शनिबार साँझ बजार जान भनेर गौर डेराबाट निस्केकी रुविको शव राति गौर नगरपालिका-९ स्थित मुडबलवा गेट नजिक सुटकेसभित्र फेला परेको थियो । साँझ ६ बजेतिर आमा मिथिलादेवी साहलाई रुविले अन्तिम पटक फोन गरेकी थिइन् । त्यसपछि रुवि फर्किइनन् ।
रुविको मोबाइल घटनास्थलमा फेला परेको छैन । घटनामा संलग्न पत्ता लगाउन विभिन्न कोणबाट अनुसन्धान भइरहेको जिल्ला प्रहरी कार्यालय गौरले जनाएको छ । मधेश प्रदेश प्रहरी कार्यालय जनकपुरका प्रमुख उमा चतुर्वेदीले घटनाको अनुसन्धान गर्न सीआईबीलाई पत्र पठाइएको बताए । ‘हामीले केही कुरा पत्ता लगाउँदै छौं,’ उनले भने, ‘घटना रहस्यमय छ । यो घटनाको अनुसन्धान गर्न सीआईबीको टोली पनि खटिने छ ।’
प्रहरीले घटनास्थल वरपरको सीसीक्यामेरा संकलन गरेर अनुसन्धान थालेको छ । रुवि छोरालाई अध्ययन गराउन कोभिड महामारीको बेलादेखि नै गौरमा डेरा लिइ बसेकी थिइन् ।
