मधेशका किसानहरू हाल चरम समस्याको सामना गरिरहेका छन् । आकाशबाट पानी एक थोपा खसेको छैन, बोरिङ र इनार सुकिसकेका छन् । धान खेतमै सुक्दै गएको छ, गाईवस्तुका लागि पानी छैन, र मानिसहरू एक गाग्री पानीका लागि लामो लाइनमा बस्न बाध्य छन् ।
यस्तो गम्भीर संकटको अवस्थामा पनि कृषि ज्ञान केन्द्र, रौतहटका प्रमुख सुरेन्द्र प्रसाद कुर्मीले विभेदपूर्ण ढंगले ‘स्यालो ट्युवेल तथा मोटर बोरिङ वितरण कार्यक्रमको सूचना केही सीमित पालिका र वडामा मात्र जारी गरेपछि किसानहरू आक्रोसित भएका छन् ।
आक्रोशित किसानहरूले सामाजिक सञ्जालमार्फत् प्रमुख कुर्मीमाथि कारबाहीको माग गरेका छन् । कृषकहरूले प्रमुख कुर्मीले अघिल्लो पटक पनि उखु प्रवर्द्धन, बगर खेती, स्यालो ट्युबवेल लगायतका योजनामा कमिसनको आधारमा योजना वितरण तथा भुक्तानी गरेको आरोप लगाएका छन् ।
रौतहटका अगुवा कृषक भोला पण्डितले योजना दिने कृषि ज्ञान केन्द्र नाममा किसानहरूलाई झुक्याएर भुक्तानीको बेलामा माथिको सेटिङ मिलाउनुपर्ने भन्दै कमिसन माग गरिएको आरोप लगाए ।
कृषि ज्ञान के न्द्रका प्रमुख कुर्मीमाथि पटक-पटक विभेद, कमिसनखोरी, सत्ता पक्षका नेताहरूको संरक्षणमा योजनाको मनोमानी वितरणजस्ता आरोप लाग्दै आएको छ ।
स्थानीय किसान रुपेश यादवले कुर्मीले सधैं वास्तविक किसानलाई बाइपास गरी विचौलियामार्फत योजना सम्झौता गर्ने गरेको आरोप लगाए। यसपटक स्यालो ट्युवेल तथा मोटर वितरण कार्यक्रमको सूचना विभेदपूर्ण तरिकाले प्रकाशित भएको भन्दै जनप्रतिनिधि, नागरिक समाज, र विभिन्न राजनीतिक दलका प्रतिनिधिहरूले सम्बन्धित निकायमा दबाब दिएका छन् ।
उनीहरूले प्रकाशित सूचना तत्काल रद्द गर्नुपर्ने, सुखाग्रस्त क्षेत्रको अनुगमन गर्नुपर्ने र जिल्लाभरिका किसानलाई समेट्ने गरी नयाँ र निष्पक्ष सूचना जारी गर्नुपर्ने माग राखेका छन् ।
त्यस्तै, प्रमुख कुर्मीमाथि छानविन गरी जिम्मेवारी मुक्त गर्ने र उनको कार्यशैलीमा सुधार ल्याउनेतर्फ पनि सरोकारवाला पक्षहरूको ध्यानाकर्षण भएको छ । कृषि क्षेत्र जस्तो संवेदनशील क्षेत्रमा काम गर्ने व्यक्तिले सबै किसानलाई समान रूपमा व्यवहार गर्न आवश्यक रहेको किसानहरूको भनाइ छ ।
