काठमाडौं । मुस्लिम आयोगका पूर्वअध्यक्ष समिम मियाँ अन्सारीले नेपाल र भारतबीचको सम्बन्धलाई अझै प्रगाढ बनाउने गरी भूमिका खेल्न आवश्यक रहेको बताएका छन् ।
शनिबार वीरगञ्जमा नेपाल भारत मिलत परिषद केन्द्रले आयोजना गरेको कार्यक्रमका अन्सारीले सीमा क्षेत्रमा धार्मिक असंहिष्णुता देखिने गरेको भन्दै त्यस्ता गतिविधिलाई नियन्त्रण गर्नुपर्ने बताए । उनले नेपाल र भारतका जनताबीचको सम्बन्ध संसारकै उत्कृष्ट रहेको बताएका छन् ।
पूर्वअध्यक्ष अन्सारीले भने, ‘नेपाल र भारतको सिमाना क्षेत्रमा धार्मिक सद्भावलाई खलबलाएको महशुस गर्छौं । वीरगञ्ज क्षेत्रमा त्यो समस्या देखिएको छ । नेपालमा बसेका सबै समुदाय मिलेर बसेका छौँ ।’
‘हामीले विश्वमा यसको उदाहरण दिन सफल भएका छौँ । हिन्दु र मुस्लिमको बीचमा नकारात्मकता फैलाउने प्रयास भएका छन् । घुसपैठिया समूहबाट सतर्क रहनुपर्छ,’ उनले भने ।
‘धार्मिक संहिष्णुता कायम गर्नुपर्छ । घुसपैठिया समूहलाई एक भएर जवाफ दिनुपर्छ,’ पूर्वअध्यक्ष अन्सारीले भनेका छन् ।
मुस्लिम आयोगका पूर्वअध्यक्ष अन्सारीले भने, ‘दुई देशबीचको सम्बन्ध । जनता जनताको सम्बन्धलाई अझै हामी कसरी सुमधुर बनाउने ? भन्नेमा छौँ । असल छिमेकी राष्ट्र भारत जानको लागि सोँचे पुग्छ । हामी बस, रेल चढेर भारतको जहाँ पनि जान सकिन्छ ।’
‘चीनमा जानु पर्दा भारतमा गएको जस्तो सजिलो छैन । पासपोर्ट चाहिन्छ । भिसा चाहन्छि । चीनमा भाषा, खानपिनदेखि लिएर सबै कुराहरूमा कठिनाइ छ ।’
कानून, न्याय तथा संसदीय मामिलामन्त्री अजय चौरसियाको प्रमुख आतिथ्यतामा भएको कार्यक्रमा पूर्वमन्त्री अब्दुल खान, सांसद खालिद सिद्धिकी, पूर्वमुख्यमन्त्री लालबाबु राउत, मुस्लिम आयोगका कार्यबाहक अध्यक्ष मोहम्मद अलिदिन, पूर्वमन्त्रीद्वय जाकिर हुसैन करिमा बेगम तथा वीरगञ्जस्थित भारतीय महावाणिज्य दूत सञ्जय कुमार लगायतको उपस्थिति रहेको थियो ।
