रौतहट ।। गौर नगरक्षेत्रको पूर्ण प्रोफाईल तयार गर्न घरधुरी सर्वेक्षण गर्न टोली परिचालनको तयारीमा रहेको गौर नगरपालिका नगरप्रमुख शम्भु साहले बताएका छन् । गौर नगरपालिकामा बसोबास गर्ने प्रत्येक नागरिकको बास्तविक तथ्याँक राख्न नगरपालिकाबाट टोली परिचालन गरेर रेकर्ड तयार पार्ने अभियान संचालन गरिने नगरप्रमुख साहले बताए ।
मंगलवार अपरान्ह गौर नगरपालिकाको कार्यालयमा आयोजित पत्रकार सम्मेलनलाई सम्बोधन गर्दै नगरप्रमुख साहले, पालिकाको ९ वटै वडामा बसोबास गर्ने नगरवासीहरुको वास्तविक अवस्था कस्तो रहेको छ ? साक्षर कतिको छ ? शौचालयको अवस्था के कस्तो छ ? विजुलबत्तीको अवस्था कस्तो छ ? रोजगारीको अवस्था ? स्वास्थ्यको अवस्था ? विद्यालय गए नगएको अवस्था ? खानेपानीको सुविधा र प्रकार, नक्सा पास वा अभिलेखिकरण भए नभएको, घरको प्रकार कस्तो छ ? चुल्होको प्रकार लगायतका नगर प्रोफाइल तयार पार्न टोली परिचालन गरिने जानकारी गराए ।
नगर प्रोफाइल तयार भएमा नगरपालिकाको लागि ठूलो सम्पत्ती हुने तथा नगरको वारेमा हरेक नागरिकलाई जान्ने एवं बुझ्ने अधिकार रहेको हुँदा अनलाईन मार्फत नगरवासी सजिलै हेर्न सकिने नगरप्रमुख साहले बताए ।
पत्रकार सम्मेलनमा मेयर साहले, गौर नगरपालिकाको पूर्ण विकासको निमित राजर्शी जनक विश्वविद्यालय अन्तर्गतबाट सम्बन्धनमा गौरमा पंडित मंगल उपाध्याय क्याम्पस यसै बर्ष देखि दुई वटा संकायबाट संचालन हुने समेत जानकारी दिए । पंडित मंगल उपाध्याय जुद्ध मावि गौरको संस्थापक नेपाली विषयको शिक्षक भएको नाताले उहाँको नामबाट क्याम्पस संचालन गरिनु उचित रहेको र यसमा विरोध गर्ने कुनै कारण नै नभएकोले क्याम्पस संचालनमा सवैको सहकार्य र सहयोगको आवश्यता रहेकोले सवैले सहयोगी भुमिका निर्वाह गरि दिन समेत उनले आग्रह गरे ।
उक्त पत्रकार सम्मेलनमा नगरपालिकाका प्रवक्ता एवं वडा नम्वर ९ का वडाध्यक्ष अर्जुन सिंह, प्रमुख प्रशासकीय अधिकृत सुभाष ठाकुर, जिन्सी प्रमुख जितेन्द्र भारती लगायतका कर्मचारीहरु तथा संचाकर्मीहरुको उपस्थिति रहेको थियो ।सभार संगम खबर
गौर नगरक्षेत्रको पूर्ण प्रोफाईल तयार गर्न घरधुरी सर्वेक्षण गर्न टोली परिचालनको तयारी ।
